Sharad Pawar Targets PM Modi: મહિલા આરક્ષણ બિલનો ઉલ્લેખ કરતાં શરદ પવારે માર્યો ટોણો, કહ્યું- કદાચ પીએમને ખબર નથી…
Sharad Pawar Targets PM Modi: હું સંરક્ષણ પ્રધાન હતો ત્યારે આર્મી, નેવી અને એરફોર્સમાં મહિલાઓને 11 ટકા અનામત આપવામાં આવી હતી: શરદ પવાર
મુંબઈ, 26 સપ્ટેમ્બરઃ Sharad Pawar Targets PM Modi: રાષ્ટ્રવાદી કોંગ્રેસ પાર્ટીના વડા શરદ પવારે આજે મહિલા આરક્ષણ બિલને લઈને રાજસ્થાનના જયપુરમાં વિપક્ષને આડે હાથ લેવાના વડાપ્રધાન નરેન્દ્ર મોદીના નિવેદન પર વળતો પ્રહાર કર્યો છે.
એનસીપી સુપ્રીમો શરદ પવારે કહ્યું કે, વર્ષ 1993માં અમે મહિલાઓને અનામત આપી હતી. મહિલાઓને અનામત આપનાર મહારાષ્ટ્ર દેશનું પ્રથમ રાજ્ય હતું. કદાચ પીએમ નરેન્દ્ર મોદીને આ ખબર નથી.
વાસ્તવમાં, પીએમ મોદીએ સોમવારે (25 સપ્ટેમ્બર) દાવો કર્યો હતો કે વિપક્ષી પાર્ટીઓએ તમારા (મહિલાઓ)ના દબાણમાં મહિલા અનામત બિલને સમર્થન આપ્યું છે.
શું કહ્યું શરદ પવારે?
પૂર્વ કેન્દ્રીય મંત્રી શરદ પવારે વધુમાં કહ્યું કે, ગઈકાલે દેશના વડાપ્રધાન (નરેન્દ્ર મોદીએ) કહ્યું હતું કે મહિલા અનામત અંગેનો નિર્ણય સંસદમાં સર્વસંમતિથી લેવામાં આવ્યો હતો. સંસદના બે સભ્યો સિવાય કોઈએ મહિલા અનામત બિલનો વિરોધ કર્યો ન હતો. અમારું સૂચન અને માંગણી હતી કે બંધારણીય સુધારા દરમિયાન ઓબીસીને પણ તક આપવી જોઈએ.
સેનાનો ઉલ્લેખ કર્યો
શરદ પવારે કહ્યું કે, તત્કાલીન કોંગ્રેસ સરકાર દરમિયાન 73માં બંધારણીય સુધારા બાદ સ્થાનિક સંસ્થાઓમાં મહિલાઓ માટે 33 ટકા ક્વોટાની જોગવાઈ કરવામાં આવી હતી. જ્યારે હું સંરક્ષણ પ્રધાન હતો ત્યારે આર્મી, નેવી અને એરફોર્સમાં મહિલાઓને 11 ટકા અનામત આપવામાં આવી હતી.
તેમણે કહ્યું કે, આ દુર્ભાગ્યપૂર્ણ છે કે પીએમ મોદીને આ સંબંધમાં યોગ્ય માહિતી આપવામાં આવી નથી. આ કારણોસર તેમણે કોંગ્રેસ વિરુદ્ધ આવા નિવેદનો આપ્યા હતા.
