Nvidiaના CEO જેન્સન હુઆંગનો મોટો ખુલાસો: પત્ની સાથે બેવફાઈ સ્વીકારી, ચીની જાસૂસીના આરોપોની તપાસ શરૂ
Nvidia: ચીની મહિલા બિઝનેસ એક્ઝિક્યુટિવ સાથેના કથિત સંબંધને લઈને વિવાદ; Nvidiaના બોર્ડે સ્વતંત્ર તપાસ શરૂ કરી, કંપનીએ કહ્યું- સુરક્ષા સાથે ચેડાં થયાના હાલ કોઈ પુરાવા નથી
ઇન્ટરનેશનલ ડેસ્ક, 09 નવેમ્બર: Nvidia: વિશ્વની અગ્રણી ટેક્નોલોજી કંપની Nvidiaના CEO અને સહ-સ્થાપક જેન્સન હુઆંગ એક મોટા વિવાદમાં ફસાયા છે. તેમણે કંપનીના કર્મચારીઓને મોકલેલા ઈમેલમાં પત્ની સાથે બેવફાઈ કરી હોવાની વાત સ્વીકારી છે અને પરિવાર, કર્મચારીઓ તથા કંપનીના બોર્ડની માફી માંગી છે. આ મામલો ત્યારે વધુ ગંભીર બન્યો જ્યારે અમેરિકન મીડિયા રિપોર્ટ્સમાં હુઆંગના એક ચીની મહિલા બિઝનેસ એક્ઝિક્યુટિવ સાથેના કથિત નજીકના સંબંધો અને ચીની જાસૂસી સાથે જોડાયેલી શંકાઓ સામે આવી.
કર્મચારીઓને ઈમેલ કરીને માફી માંગી
જેન્સન હુઆંગે 8 નવેમ્બરે Nvidiaના કર્મચારીઓને મોકલેલા સંદેશમાં પોતાની ભૂલ સ્વીકારી હતી. તેમણે લખ્યું કે તેઓ પોતાની પત્ની પ્રત્યે વફાદાર રહ્યા નહોતા અને તેમના પગલાંથી પત્ની તથા બાળકોને દુઃખ પહોંચ્યું છે. તેમણે આ માટે કોઈ બહાનું ન હોવાનું જણાવી પોતાની જવાબદારી સ્વીકારી હતી.
હુઆંગે પોતાના પરિવારને સંબોધીને કહ્યું કે તેઓ તેમને પ્રેમ કરે છે અને આશા રાખે છે કે સમય જતાં પરિવારનો વિશ્વાસ ફરી મેળવી શકશે. તેમણે કંપનીના કર્મચારીઓ, બોર્ડ, ભાગીદારો અને શેરધારકોની પણ માફી માંગી હતી.
ચીની મહિલા સાથેના કથિત સંબંધની તપાસ
આ વિવાદનો સંબંધ એલિસ હુઆંગ નામની ચીની નાગરિક સાથે જોડવામાં આવી રહ્યો છે. મીડિયા રિપોર્ટ્સ અનુસાર, તે સિંગાપોર સ્થિત ડેટા સેન્ટર કંપની Megaspeedની પૂર્વ એક્ઝિક્યુટિવ રહી ચૂકી છે. અમેરિકાની ગુપ્તચર એજન્સીઓને શંકા હોવાનો અહેવાલ છે કે તે ચીન માટે માહિતી એકત્રિત કરતી હતી અને હુઆંગ સાથેના નજીકના સંબંધોનો ઉપયોગ કરીને Nvidiaની અદ્યતન AI ચિપ્સ સંબંધિત માહિતી મેળવવાનો પ્રયાસ થયો હોઈ શકે છે.
જોકે, આ આરોપો અંગે હજુ તપાસ ચાલી રહી છે. જેન્સન હુઆંગે પોતાના ઈમેલમાં બેવફાઈ સ્વીકારી છે, પરંતુ તેમણે એલિસ હુઆંગ સાથેના સંબંધો અથવા જાસૂસીના આરોપોની વિગતો સ્પષ્ટ રીતે સ્વીકારી નથી.
Nvidiaના બોર્ડે સ્વતંત્ર તપાસ શરૂ કરી
આ મામલાને ધ્યાનમાં રાખીને Nvidiaના બોર્ડ ઓફ ડિરેક્ટર્સે સ્વતંત્ર તપાસ શરૂ કરવાની જાહેરાત કરી છે. તપાસની જવાબદારી સ્વતંત્ર ડિરેક્ટર્સની સમિતિને સોંપવામાં આવશે, જેને બહારના કાનૂની નિષ્ણાતો પણ મદદ કરશે.
કંપનીએ જણાવ્યું છે કે હાલ તેની પાસે એવો કોઈ આધાર નથી કે અમેરિકાની રાષ્ટ્રીય સુરક્ષા અથવા Nvidiaની ગુપ્ત માહિતી સાથે ચેડાં થયા છે. જોકે, બોર્ડ તમામ ઉપલબ્ધ માહિતીની તપાસ કરશે. હુઆંગે પણ આ તપાસને સંપૂર્ણ સહયોગ આપવાની ખાતરી આપી છે.
આ પણ વાંચો:- Face Care: ચહેરાના ડાઘ દૂર કરી ત્વચામાં ચમક લાવવા અજમાવો આ ઘરેલૂ ઉપાય
Nvidiaના ચીન સાથેના વેપાર પર પણ નજર
આ વિવાદ માત્ર હુઆંગના અંગત જીવન પૂરતો સીમિત નથી. Megaspeed કંપની Nvidiaની AI ચિપ્સ ખરીદતી હતી અને અમેરિકન અધિકારીઓએ તેના પર ચીન સુધી પ્રતિબંધિત અદ્યતન ચિપ્સ પહોંચાડવામાં મદદ કરવાનો શંકા વ્યક્ત કરી હતી. આ કારણે અમેરિકાના રાષ્ટ્રીય સુરક્ષા સંબંધિત પ્રશ્નો પણ ઊભા થયા છે.
અમેરિકાના કેટલાક સાંસદોએ પણ આ મામલે હુઆંગ પાસેથી સ્પષ્ટતા માંગવાની વાત કરી છે. અમેરિકાના વિદેશ મંત્રી માર્કો રુબિયોએ આ અંગે ટિપ્પણી કરવાનો ઇનકાર કર્યો હતો અને તેને કંપનીનો આંતરિક મામલો ગણાવ્યો હતો.
CEO તરીકે કામગીરી ચાલુ રાખશે હુઆંગ
Nvidiaએ સ્પષ્ટ કર્યું છે કે તપાસ દરમિયાન પણ જેન્સન હુઆંગ CEO તરીકે પોતાની જવાબદારી નિભાવતા રહેશે. કંપનીના પ્રવક્તાએ જણાવ્યું હતું કે આ ઘટનાથી Nvidiaની કામગીરી અટકશે નહીં અને હુઆંગ કંપનીનું નેતૃત્વ ચાલુ રાખશે.
હાલ આ મામલે તપાસ ચાલી રહી છે. તેથી ચીની જાસૂસી, કંપનીની ગુપ્ત માહિતી અને હુઆંગના કથિત સંબંધો અંગેના આરોપોને તપાસ પૂર્ણ થાય ત્યાં સુધી આરોપ તરીકે જ જોવાના રહેશે.