IRF Ban: ઝાકિર નાઈકની IRF પર UAPA હેઠળ પ્રતિબંધ વધુ પાંચ વર્ષ લંબાયો
IRF Ban: કેન્દ્ર સરકારે ઇસ્લામિક રિસર્ચ ફાઉન્ડેશનને ફરી ગેરકાયદેસર સંગઠન જાહેર કર્યું; ગૃહ મંત્રાલયે રાષ્ટ્રીય સુરક્ષા, સાંપ્રદાયિક સૌહાર્દ અને આતંકવાદી પ્રવૃત્તિઓ અંગે ગંભીર ચિંતા વ્યક્ત કરી.
નવી દિલ્હી, 13 નવેમ્બર: IRF Ban: આતંકવાદ અને દેશવિરોધી પ્રવૃત્તિઓ સામે કડક કાર્યવાહી કરવાની નીતિના ભાગરૂપે કેન્દ્ર સરકારે ઇસ્લામિક રિસર્ચ ફાઉન્ડેશન (IRF) પરનો પ્રતિબંધ વધુ પાંચ વર્ષ માટે લંબાવ્યો છે. ગૃહ મંત્રાલયે ગેરકાયદેસર પ્રવૃત્તિઓ નિવારણ અધિનિયમ (UAPA) હેઠળ આ સંગઠનને ફરીથી ગેરકાયદેસર સંગઠન જાહેર કર્યું છે. આ સંગઠનના સ્થાપક અને પ્રમુખ ડૉ. ઝાકિર નાઈક છે.
કેન્દ્રીય ગૃહ મંત્રાલય દ્વારા 13 નવેમ્બર 2026ના રોજ જાહેર કરાયેલા નિર્ણય મુજબ, IRF સામેનો (IRF Ban) અગાઉનો પ્રતિબંધ 14 નવેમ્બર 2026ના રોજ સમાપ્ત થવાનો હતો. તેના એક દિવસ પહેલાં જ કેન્દ્ર સરકારે પ્રતિબંધ લંબાવવાનો નિર્ણય લીધો છે. નવા આદેશ હેઠળ આ પ્રતિબંધ વધુ પાંચ વર્ષ સુધી અમલમાં રહેશે.
વડાપ્રધાન મોદીની ઝીરો ટોલરન્સ નીતિ
વડાપ્રધાન નરેન્દ્ર મોદીના આતંકવાદ અને દેશવિરોધી પ્રવૃત્તિઓ સામે ઝીરો ટોલરન્સના અભિગમને અનુરૂપ આ કાર્યવાહી કરવામાં આવી હોવાનું ગૃહ મંત્રાલયે જણાવ્યું છે.
ગૃહમંત્રી કાર્યાલયે સોશિયલ મીડિયા પ્લેટફોર્મ X પરની પોસ્ટમાં જણાવ્યું હતું કે ડૉ. ઝાકિર નાઈકના નેતૃત્વ હેઠળનું ઇસ્લામિક રિસર્ચ ફાઉન્ડેશન ભારતવિરોધી પ્રવૃત્તિઓમાં સામેલ રહ્યું હોવાનો સરકારનો મત છે. મંત્રાલયે સંગઠન પર ધાર્મિક સમુદાયો વચ્ચે નફરત અને શત્રુતા ફેલાવવાના પ્રયાસો તથા આતંકવાદને પ્રોત્સાહન આપવાના ગંભીર આરોપો મૂક્યા છે.
In steadfast adherence to PM Shri @narendramodi Ji’s vision of zero tolerance towards terrorism and anti-national activities, MHA extends the ban on the Islamic Research Foundation as an unlawful association under the UAPA. Led by fugitive terror preacher Dr Zakir Naik, the organisation has been involved in sinister anti-India designs, including inciting communal hatred and promoting terrorism. The group has been found to be propagating a venomous ideology of terrorism and separatism, instigating violent unrest, encouraging the regrouping of absconding terrorists and fomenting communal discord. https://t.co/GHgUgAqXVj
— गृहमंत्री कार्यालय, HMO India (@HMOIndia) November 13, 2026
સરકારના જણાવ્યા અનુસાર, સંગઠનની પ્રવૃત્તિઓ દેશની સુરક્ષા, એકતા અને સાંપ્રદાયિક શાંતિ માટે જોખમ ઊભું કરી શકે છે. આ જ કારણોસર પ્રતિબંધ ચાલુ રાખવો જરૂરી માનવામાં આવ્યો છે.
ઝાકિર નાઈકનાં ભાષણો અને નિવેદનો અંગે સરકારની ચિંતા
ગૃહ મંત્રાલય દ્વારા જાહેર કરાયેલી સૂચનામાં ડૉ. ઝાકિર નાઈકનાં ભાષણો અને નિવેદનો અંગે ગંભીર વાંધા વ્યક્ત કરવામાં આવ્યા છે. સરકારના મતે, તેમનાં કેટલાંક નિવેદનો વિવિધ ધાર્મિક સમુદાયો વચ્ચે અણબનાવ, વૈમનસ્ય અને નફરતને પ્રોત્સાહન આપી શકે છે.
આ પણ વાંચો:- Phone Tapping Allegation: ‘મારો ફોન ટેપ થઈ રહ્યો છે’, રાહુલ ગાંધીનો મોટો આરોપ
મંત્રાલયે એવો પણ આક્ષેપ કર્યો છે કે તેમના ભાષણો અને વિચારો દ્વારા યુવાનોને કટ્ટરપંથી પ્રવૃત્તિઓ તરફ પ્રેરિત કરવાનો પ્રયાસ થયો છે. આંતરરાષ્ટ્રીય સેટેલાઇટ ટેલિવિઝન નેટવર્ક, ઇન્ટરનેટ, પ્રિન્ટ મીડિયા અને સોશિયલ મીડિયા મારફતે તેમના વિચારો લાખો લોકો સુધી પહોંચ્યા હોવાનો પણ ઉલ્લેખ કરવામાં આવ્યો છે.
સરકારની આશંકા છે કે જો સંગઠન પરનો પ્રતિબંધ હટાવવામાં આવે તો તેની પ્રવૃત્તિઓ ફરી શરૂ થઈ શકે છે. મંત્રાલયના જણાવ્યા અનુસાર, સંગઠનના ફરાર કાર્યકરોને ફરી સંગઠિત કરવા, અલગતાવાદી વિચારધારાને પ્રોત્સાહન આપવા અને દેશની સાંપ્રદાયિક એકતાને નુકસાન પહોંચાડવાની શક્યતા પણ ધ્યાનમાં લેવામાં આવી છે.
UAPA હેઠળ ત્રીજી વખત પ્રતિબંધ લંબાવાયો
ઇસ્લામિક રિસર્ચ ફાઉન્ડેશન પર સૌપ્રથમ 17 નવેમ્બર 2016ના રોજ UAPA હેઠળ પ્રતિબંધ મૂકવામાં આવ્યો હતો. ત્યારબાદ નવેમ્બર 2021માં આ પ્રતિબંધ વધુ પાંચ વર્ષ માટે લંબાવવામાં આવ્યો હતો. હવે નવેમ્બર 2026માં કેન્દ્ર સરકારે ત્રીજી વખત આ કાર્યવાહી કરીને પ્રતિબંધને વધુ પાંચ વર્ષ સુધી ચાલુ રાખવાનો નિર્ણય કર્યો છે.
અગાઉના પ્રતિબંધની કાયદેસર સમીક્ષા માટે UAPA હેઠળ રચાયેલા ટ્રિબ્યુનલે પણ સંગઠનને ગેરકાયદેસર જાહેર કરવાના નિર્ણયને સમર્થન આપ્યું હતું. નવા આદેશમાં પણ કાયદાની જોગવાઈઓ હેઠળ કાર્યવાહી કરવામાં આવી છે. આ પ્રતિબંધ સત્તાવાર ગેઝેટમાં પ્રકાશનની તારીખથી અમલમાં રહેશે અને કાયદા હેઠળની ન્યાયિક પ્રક્રિયાને આધીન રહેશે.
રાષ્ટ્રીય સુરક્ષા અને સાંપ્રદાયિક સૌહાર્દને પ્રાથમિકતા
કેન્દ્ર સરકારનું કહેવું છે કે રાષ્ટ્રીય સુરક્ષા, દેશની અખંડિતતા અને સામાજિક શાંતિ જાળવવા માટે આ નિર્ણય જરૂરી છે. ધાર્મિક આધાર પર અલગ-અલગ સમુદાયો વચ્ચે વૈમનસ્ય ઊભું થાય તેવી પ્રવૃત્તિઓને રોકવા માટે કાયદાકીય કાર્યવાહી ચાલુ રાખવામાં આવશે.
આ નિર્ણય બાદ ઇસ્લામિક રિસર્ચ ફાઉન્ડેશનની પ્રવૃત્તિઓ પર પ્રતિબંધ આગામી પાંચ વર્ષ સુધી યથાવત્ રહેશે. ગૃહ મંત્રાલયે સ્પષ્ટ સંકેત આપ્યો છે કે આતંકવાદ, અલગતાવાદ અને દેશની સુરક્ષાને અસર કરતી પ્રવૃત્તિઓ સામે કડક વલણ ચાલુ રહેશે.