Mahatma Muldas Bapa: અમોદ્રામાં સંતશ્રી મૂળદાસ બાપાની 352મી જન્મજ્યંતી અને મંદિર પુનઃ પ્રતિષ્ઠા મહોત્સવ
Mahatma Muldas Bapa: 19થી 21 નવેમ્બર દરમિયાન ત્રિદિવસીય મહોત્સવ યોજાશે; સંતવાણી, લોકડાયરો, શોભાયાત્રા, ધર્મસભા, પ્રાણપ્રતિષ્ઠા અને મહાપ્રસાદ સહિત વિવિધ ધાર્મિક કાર્યક્રમો યોજાશે
અમોદ્રા (ઉના), 18 નવેમ્બર: Mahatma Muldas Bapa: સમસ્ત લુહાર, સુથાર અને પંચાલ સમાજ માટે શ્રદ્ધા અને આધ્યાત્મિક ઉત્સાહના અવસર સમાન સંતશ્રી મહાત્મા મૂળદાસ બાપાની 352મી જન્મજ્યંતી નિમિત્તે અમોદ્રા (ઉના) સ્થિત મૂળદાસ ધામ ખાતે ભવ્ય ત્રિદિવસીય ધાર્મિક મહોત્સવનું આયોજન કરવામાં આવ્યું છે. 19થી 21 નવેમ્બર, 2026 દરમિયાન કારતક સુદ નોમથી અગિયારસ સુધી સંતશ્રીની જન્મજ્યંતી સાથે નવનિર્મિત ભવ્ય મંદિરની પુનઃપ્રતિષ્ઠા અને વિવિધ દેવી-દેવતાઓની પ્રાણપ્રતિષ્ઠાના કાર્યક્રમો ભક્તિભાવપૂર્વક યોજાશે.
અમોદ્રા ગામમાં મૂળદાસ ધામના(Mahatma Muldas Bapa) પટાંગણમાં જૂના મંદિરની ભૂમિ પર નૂતન મંદિરનું નિર્માણ કરવામાં આવ્યું છે. મંદિર નિર્માણના સ્વપ્નદ્રષ્ટા અને મુખ્ય દાતા મહેશભાઈ નરોત્તમદાસ કવા (બુચરવાડા-દીવ, હાલ લંડન) તેમજ વિવિધ શહેરોના દાતાઓના સહયોગથી આ મહોત્સવનું આયોજન કરવામાં આવ્યું છે.
પ્રથમ દિવસ: મંગલકારી કાર્યક્રમો અને જલયાત્રા
19 નવેમ્બર, ગુરુવારના રોજ મહોત્સવના(Mahatma Muldas Bapa) પ્રથમ દિવસે ધાર્મિક વિધિઓ સાથે કાર્યક્રમોનો પ્રારંભ થશે. સવારે હેમાદ્રિ શ્રવણ, ગણેશ પૂજન, મંડપ પ્રવેશ અને ભવ્ય જલયાત્રા સહિતના મંગલકારી કાર્યક્રમો યોજાશે. આ દિવસ મંદિર પ્રતિષ્ઠા મહોત્સવની ધાર્મિક શરૂઆત અને ભક્તિભાવના વાતાવરણને સમર્પિત રહેશે.
આ પણ વાંચો :– Girnar Lili Parikrama: ગિરનાર લીલી પરિક્રમા 20 નવેમ્બરથી શરૂ, લાખો શ્રદ્ધાળુઓ માટે તંત્ર સજ્જ – Desh ki Aawaz
બીજા દિવસે યજ્ઞ, સંતવાણી અને લોકડાયરો
20 નવેમ્બર, શુક્રવારના રોજ દેવતાઓના પૂજન-અર્ચન સાથે યજ્ઞનો પ્રારંભ થશે. દિવસ દરમિયાન ધાર્મિક વિધિઓ યોજાશે, જ્યારે રાત્રે 9 વાગ્યે ભવ્ય સંતવાણી અને લોકડાયરાનું આયોજન કરવામાં આવ્યું છે. સંતવાણી અને લોકસંગીત દ્વારા ભક્તિરસ તથા ગુજરાતી લોકસંસ્કૃતિની ઝલક રજૂ કરવામાં આવશે.
ત્રીજા દિવસે પ્રાણપ્રતિષ્ઠા, શોભાયાત્રા અને ધર્મસભા
21 નવેમ્બર, શનિવારના રોજ મહોત્સવના અંતિમ દિવસે ન્યાસ, દેવતાઓની પુનઃપ્રાણપ્રતિષ્ઠા, ધ્વજારોહણ અને શિખર પ્રતિષ્ઠા સહિતની પવિત્ર ધાર્મિક વિધિઓ યોજાશે.
આ દિવસના કાર્યક્રમો નીચે મુજબ રહેશે:
- સવારે 8 વાગ્યે – ચરણ પાદુકા પૂજન
- સવારે 9 વાગ્યે – ભવ્ય શોભાયાત્રા
- સવારે 11 વાગ્યે – ધર્મસભા અને સંતો-દાતાઓનો સન્માન સમારોહ
- બપોરે 12 વાગ્યે – મહાપ્રસાદ
- સાંજે 4 વાગ્યે – બીડુ હોમ અને મહોત્સવની પૂર્ણાહુતિ
ત્રીજા દિવસે વિવિધ ધાર્મિક વિધિઓ અને સામાજિક કાર્યક્રમો સાથે મંદિર પુનઃપ્રતિષ્ઠા મહોત્સવ પૂર્ણ થશે.
સંતો-મહંતો અને સમાજના અગ્રણીઓ ઉપસ્થિત રહેશે
ત્રિદિવસીય મહોત્સવમાં વિવિધ આશ્રમોના સંતો-મહંતો ઉપસ્થિત રહી આશીર્વચન પાઠવશે. ધાર્મિક મહાનુભાવો, અમોદ્રા ગામના લોકો, લુહાર સમાજના વિવિધ દેવસ્થાનોના પ્રતિનિધિઓ, ધાર્મિક અને સામાજિક સંસ્થાઓના હોદ્દેદારો, સમાજના અગ્રણીઓ, પત્રકારો તથા દેશભરમાંથી આવતા સમાજના સભ્યો મોટી સંખ્યામાં હાજર રહેવાની અપેક્ષા છે.
મહાત્મા મૂળદાસજી ટ્રસ્ટ દ્વારા તમામ ભક્તો, જ્ઞાતિજનો, વડીલો, માતાઓ, ભાઈઓ અને બહેનોને મહોત્સવના તમામ ધાર્મિક કાર્યક્રમો તથા મહાપ્રસાદનો લાભ લેવા ભાવભર્યું આમંત્રણ પાઠવવામાં આવ્યું છે.
સંતશ્રી મહાત્મા મૂળદાસ બાપાની 352મી જન્મજ્યંતી અને નૂતન મંદિરની પુનઃપ્રતિષ્ઠાનો આ ઐતિહાસિક મહોત્સવ સમગ્ર લુહાર, સુથાર અને પંચાલ સમાજ માટે શ્રદ્ધા, ભક્તિ, એકતા અને સામાજિક સમરસતાના ઉત્સવ તરીકે ઉજવાશે.
