Dasun Shanaka in IPL 2023: શ્રીલંકાના કેપ્ટન દસુન શનાકાને પ્રથમવાર મળ્યો આઇપીએલ કોન્ટ્રાક્ટ, આ ટીમ તરફથી રમતા જોવા મળશે

Dasun Shanaka in IPL 2023: ગુજરાત ટાઇટન્સે ન્યૂઝીલેન્ડના કેન વિલિયમ્સનની જગ્યાએ શ્રીલંકાના કેપ્ટન દાસુન શનાકાનો સમાવેશ કર્યો

ખેલ ડેસ્ક, 05 એપ્રિલ: Dasun Shanaka in IPL 2023: ગુજરાત ટાઇટન્સે ન્યૂઝીલેન્ડના કેન વિલિયમ્સનની જગ્યાએ શ્રીલંકાના કેપ્ટન દાસુન શનાકાનો સમાવેશ કર્યો છે. IPLની 16મી સીઝનની પ્રથમ મેચમાં ચેન્નઈ સુપર કિંગ્સ સામે ફિલ્ડિંગ કરતી વખતે વિલિયમ્સન ઈજાગ્રસ્ત થયો હતો. શનાકાને પ્રથમ વખત આઈપીએલ કોન્ટ્રાક્ટ મળ્યો છે. દિલ્હી કેપિટલ્સ સામે ગુજરાતની બીજી મેચ બાદ શનાકા ટીમ સાથે જોડાશે.

ખબર હોય કે, શનાકાએ 181 ટી20 મેચ રમી છે. આ દરમિયાન તેણે 141.94ની સ્ટ્રાઈક રેટથી 3702 રન બનાવ્યા છે. તેણે 8.8ના ઇકોનોમી રેટથી 59 વિકેટ પણ લીધી છે. શનાકાએ આ વર્ષે ભારત સામેની ત્રણ T20 શ્રેણીમાં 187.87ની સ્ટ્રાઈક રેટથી 124 રન બનાવ્યા હતા. તે શાનદાર ફોર્મમાં છે. શનાકાના અનુભવનો ગુજરાતને ફાયદો થશે.

ગુજરાતે રવિવાર (2 એપ્રિલના) રોજ સત્તાવાર જાહેરાત કરતાં કહ્યું- અમને એ જાહેરાત કરતાં દુઃખ થાય છે કે કેન વિલિયમ્સન ચેન્નઈ સુપર કિંગ્સ સામેની સીઝનની પ્રથમ મેચમાં ઈજાગ્રસ્ત થયા બાદ ટાટા IPL 2023માંથી બહાર થઈ ગયો છે. અમે અમારા ટાઇટનને ઝડપથી સ્વસ્થ થવાની ઈચ્છા કરીએ છીએ અને આશા રાખીએ છીએ કે તે ટૂંક સમયમાં મેદાન પર પાછો ફરે.

વિલિયમ્સન છગ્ગાને રોકવાના પ્રયાસમાં ઘાયલ થયો હતો

જણાવી દઈએ કે, ચેન્નઈ સામેની મેચમાં 32 વર્ષીય વિલિયમ્સન 13મી ઓવરમાં બાઉન્ડ્રી પર ફિલ્ડિંગ કરતી વખતે ઈજાગ્રસ્ત થયો હતો. 13મી ઓવરમાં ચેન્નઈના ઓપનર ઋતુરાજ ગાયકવાડે જોશુઆ લિટલની બોલ પર ઉંચો શોટ ફટકાર્યો હતો.

એવું લાગતું હતું કે સિક્સ જશે પરંતુ બાઉન્ડ્રી લાઇન પર ઊભેલા કેન વિલિયમ્સને કૂદકો મારી બોલ પકડી લીધો હતો અને તે બાઉન્ડ્રી લાઇનની બહાર પડે તે પહેલા તેણે બોલને અંદરની તરફ ફેંકી દીધો. વિલિયમ્સને છ રન બચાવ્યા, પરંતુ તેના ઘૂંટણમાં ઈજા થઈ હતી.

દિલ્હીને હરાવીને ટોપ પર પહોંચી ગુજરાત ટાઇટન્સ

IPL 2023ની સાતમી મેચમાં દિલ્હી કેપિટલ્સે ટૂર્નામેન્ટમાં સતત બીજી હારનો સામનો કરવો પડ્યો. ગુજરાત ટાઇટન્સે દિલ્હીને છ વિકેટના વિશાળ અંતરથી હરાવ્યું હતું. આ સાથે ડિફેન્ડિંગ ચેમ્પિયન ગુજરાત પોઈન્ટ ટેબલમાં પ્રથમ ક્રમે આવી ગયું છે. તેણે તેની તમામ બે મેચ જીતી છે. આ પહેલા ગુજરાતે ટૂર્નામેન્ટની પહેલી જ મેચમાં ચેન્નઈ સુપર કિંગ્સને હરાવ્યું હતું.

સતત બે મેચ હાર્યા બાદ દિલ્હી કેપિટલ્સ 10 ટીમના પોઈન્ટ ટેબલમાં આઠમા સ્થાને સરકી ગઈ છે. માત્ર મુંબઈ ઈન્ડિયન્સ અને સનરાઈઝર્સ હૈદરાબાદની ટીમો જેઓ પોતાની પ્રથમ મેચ ખરાબ રીતે હારી છે, તેઓ દિલ્હીથી નીચે છે. જો ટોપ-4 ટીમોની વાત કરીએ તો રાજસ્થાન પોતાની પ્રથમ મેચ જીતીને બીજા સ્થાને છે.

આરસીબીએ પણ માત્ર એક જ મેચ રમી છે. આ મેચ પોતાના નામે કરીને આ ટીમ ત્રીજા સ્થાને છે. લખનઉ સુપર જાયન્ટ્સે બેમાંથી એક મેચ જીતી છે જ્યારે આગામી મેચમાં તેનો પરાજય થયો હતો. તે આ ટેબલમાં ચોથા સ્થાને છે.

આ પણ વાંચો: 14th April Rashifal: સારા સમાચાર! 14 એપ્રિલથી આ લોકોને કરિયર અને બિઝનેસમાં સફળતા મળશે

દેશ કી આવજના સમાચાર ફેસબુક પર મેળવવા માટે ફેસબુક પેજ લાઈક કરો