WhatsApp New Feature: WhatsAppનું નવું ફીચર: મેસેજ વાંચ્યા પછી થઈ જશે ગાયબ
WhatsApp New Feature: WhatsAppએ એન્ડ્રોઇડના પસંદગીના બીટા યુઝર્સ માટે ‘View Once Text Messages’ ફીચર શરૂ કર્યું; મેસેજ એક જ વાર વાંચી શકાશે અને ત્યારબાદ ચેટમાંથી ગાયબ થઈ જશે.
ટેક્નોલોજી ડેસ્ક, 12 નવેમ્બર: WhatsApp New Feature: લોકપ્રિય મેસેજિંગ એપ WhatsApp પોતાના યુઝર્સની પ્રાઇવસી વધુ મજબૂત બનાવવા માટે નવું ફીચર રજૂ કરી રહી છે. હવે યુઝર્સ માત્ર ફોટો, વીડિયો અને વોઇસ મેસેજ જ નહીં, પરંતુ ટેક્સ્ટ મેસેજ પણ એક જ વાર જોઈ શકાય તે રીતે મોકલી શકશે. આ નવા ફીચરને ‘View Once Text Messages’ નામ આપવામાં આવ્યું છે.
વાંચ્યા પછી મેસેજ થઈ જશે ગાયબ
આ ફીચર હેઠળ મોકલવામાં આવેલો ટેક્સ્ટ મેસેજ પ્રાપ્તકર્તા માત્ર એક જ વાર ખોલી શકશે. મેસેજ વાંચ્યા બાદ તેને બંધ કરતાં જ તે ફરીથી જોઈ શકાશે નહીં અને બંને તરફની ચેટમાંથી ગાયબ થઈ જશે.
આ પણ વાંચો:- Defence Technology: ત્રણેય સેનાઓના સંકલન પર ભાર: સંરક્ષણ મંત્રી
કેવી રીતે મોકલશો View Once મેસેજ?
- WhatsApp New Feature: WhatsAppમાં વ્યક્તિગત અથવા ગ્રુપ ચેટ ખોલો.
- મેસેજ ટાઇપ કરો.
- મોકલવાના લીલા બટનને દબાવીને રાખો.
- મેનૂમાં ‘View Once’ વિકલ્પ દેખાય તો તેને પસંદ કરો.
- મેસેજ મોકલી દો.
પ્રાપ્તકર્તાને મેસેજ સામાન્ય ચેટમાં સીધો દેખાશે નહીં. તેને મેસેજ પર ટેપ કરીને અલગ સ્ક્રીન પર વાંચવો પડશે.
મેસેજની કોપી કે ફોરવર્ડ નહીં કરી શકાય
આ ફીચરમાં પ્રાઇવસી માટે કેટલીક સુરક્ષા વ્યવસ્થાઓ પણ આપવામાં આવી છે. પ્રાપ્તકર્તા મેસેજને કોપી, સેવ કે ફોરવર્ડ કરી શકશે નહીં. મેસેજ જોતી વખતે એપમાં સ્ક્રીનશૉટ અને સ્ક્રીન રેકોર્ડિંગ પણ બ્લોક કરવામાં આવે છે.
હાલમાં કોને મળશે આ ફીચર?
હાલમાં (WhatsApp New Feature) WhatsApp આ ફીચર Androidના પસંદગીના બીટા યુઝર્સ માટે ધીમે-ધીમે રોલઆઉટ કરી રહી છે. WhatsApp Beta વર્ઝન 2.26.45.6 ધરાવતા કેટલાક યુઝર્સને આ સુવિધા મળી રહી છે. આગામી અઠવાડિયાંમાં વધુ યુઝર્સ સુધી પહોંચાડવાની પ્રક્રિયા ચાલુ રહેશે.
હાલમાં તમામ Android યુઝર્સ માટે આ ફીચર ઉપલબ્ધ નથી અને દરેકને ક્યારે મળશે તેની સત્તાવાર તારીખ જાહેર કરવામાં આવી નથી.
આ નવું ફીચર પાસવર્ડ, ખાનગી માહિતી અથવા સંવેદનશીલ ટેક્સ્ટ શેર કરતી વખતે ઉપયોગી થઈ શકે છે. જોકે, કોઈ વ્યક્તિ અન્ય ડિવાઇસથી સ્ક્રીનનો ફોટો કે વીડિયો લઈ શકે છે, તેથી અત્યંત ગુપ્ત માહિતી શેર કરતી વખતે સાવચેતી રાખવી જરૂરી છે.