Fishing Harbor Fire: આંધ્ર પ્રદેશના વિશાખાપટ્ટનમમાં થયો મોટો અકસ્માત, 25થી વધુ બોટ સળગીને રાખ
Fishing Harbor Fire: આગ લાગ્યા બાદ બંદર પર હાજર સ્થાનિક માછીમારોએ તાત્કાલિક સ્થાનિક પોલીસને ફોન કરીને ઘટનાની જાણ કરી
નવી દિલ્હી, 20 નવેમ્બરઃ Fishing Harbor Fire: આંધ્ર પ્રદેશના વિશાખાપટ્ટનમ શહેરમાં સ્થિત ફિશિંગ બંદરમાં આજે એક મોટો અકસ્માત થયો છે. અહીંના ફિશિંગ બંદર પર ભીષણ આગ ફાટી નીકળી હતી, જેના કારણે બંદર પર પાર્ક કરેલી 25 યાંત્રિક ફિશિંગ બોટ બળીને રાખ થઈ ગઈ હતી. આગ રવિવારે મોડી રાત્રે શરૂ થઈ હતી, જે આજે વહેલી સવાર સુધી ચાલુ રહી હતી. આ સમગ્ર ઘટનાનો એક વીડિયો પણ સામે આવ્યો છે, જેમાં બોટ સળગતી જોઈ શકાય છે.
આગ લાગ્યા બાદ બંદર પર હાજર સ્થાનિક માછીમારોએ તાત્કાલિક સ્થાનિક પોલીસને ફોન કરીને ઘટનાની જાણ કરી હતી. માછીમારોએ જણાવ્યું હતું કે આગ એક બોટમાંથી શરૂ થઈ હતી, જે ટૂંક સમયમાં અન્ય બોટમાં ફેલાઈ ગઈ હતી.
આગ એટલી ઝડપથી ફેલાઈ હતી કારણ કે જે બોટમાં આગ લાગી હતી તેની આસપાસ અન્ય બોટ લાંગરવામાં આવી હતી. જેના કારણે આગ ઝડપથી ફેલાઈ હતી. મોટાભાગની બોટો લાકડાની હતી અથવા તો તેમાં પ્લાસ્ટિક હતી જેના કારણે આગ વધુ ફેલાઈ હતી.
આગને કારણે 40 જેટલી ફિશિંગ બોટને નુકસાન
વાસ્તવમાં આ આગની ઘટના પાછળ એલપીજી સિલિન્ડરનો હાથ છે. બોટમાં રાખવામાં આવેલા એલપીજી સિલિન્ડરમાં જોરદાર વિસ્ફોટ થયો હતો. જેના કારણે અફરાતફરીનો માહોલ સર્જાયો હતો.
સિલિન્ડર ફાટવાનો અવાજ દૂર સુધી સંભળાયો હતો. સિલિન્ડરના વિસ્ફોટ પછી, આગ શરૂ થઈ હતી, જેણે થોડી જ વારમાં 25 બોટનો નાશ કર્યો હતો. જો કે, એલપીજી સિલિન્ડરમાં વિસ્ફોટ કયા કારણોસર થયો તે સમજવાના પ્રયાસો ચાલુ છે.
ડેપ્યુટી કમિશનર ઓફ પોલીસ કે આનંદ રેડ્ડીએ જણાવ્યું છે કે આગ પર કાબૂ મેળવવા માટે ચારથી વધુ ફાયર એન્જિન તૈનાત કરવામાં આવ્યા છે. તેમણે કહ્યું કે અત્યાર સુધી જાન-માલના નુકસાનના કોઈ સમાચાર નથી.
માછીમારોએ જણાવ્યું કે આગને કારણે 40 જેટલી ફિશિંગ બોટને નુકસાન થયું છે. દરેક બોટની કિંમત ઓછામાં ઓછી 40 લાખ રૂપિયા હતી. પોલીસ અને ફાયર સર્વિસના કર્મચારીઓએ જણાવ્યું કે આગ પર કાબૂ મેળવ્યા બાદ તેઓ આગનું ચોક્કસ કારણ શોધી કાઢશે.
આ પણ વાંચો… AUS Win World Cup 2023: ફરી એકવાર તૂટ્યા કરોડો ચાહકોના દિલ, વર્લ્ડ કપ ફાઇનલમાં હારી ગયું ભારત
