Aishwarya Majmudar: ગુજરાતની વિખ્યાત ગાયિકા ઐશ્વર્યા મજમુદારની યશકલગીમાં ઓર એક પીછું ઉમેરાયું
Aishwarya Majmudar: અમેરિકામાં વડા પ્રધાન નરેન્દ્ર મોદીની ઉપસ્થિતિમાં ઐશ્વર્યાએ ગરબાની રમઝટ બોલાવ્યા બાદ રાષ્ટ્રગીત પણ ગાયું
વિદેશ પ્રધાન એસ. જયશંકરે સોશિયલ મીડિયા પર ઐશ્વર્યાનો વિડિયો શેર કર્યો
ન્યૂ યોર્ક, 23 સપ્ટેમ્બર: Aishwarya Majmudar: વડા પ્રધાન નરેન્દ્ર મોદી સ્વૉડ દેશોની બેઠકમાં હાજરી આપવા ત્રણ દિવસની અમેરિકાની મુલાકાતે ગયા છે. સમગ્ર દુનિયાની નજર ભારતના વડા પ્રધાન નરેન્દ્ર મોદીની ગતિવિધિ પર છે. અમેરિકાની ત્રિદિવસીય મુલાકાત દરમિયાન નરેન્દ્ર મોદીએ ન્યૂ યોર્કના લૉંગ આઇલૅન્ડ સ્થિત નાસાઉ કૉલિજિયમ ખાતે અમેરિકામાં વસતા ભારતીય નાગરિકોને સંબોધ્યા હતા. અમેરિકાના વિવિધ રાજ્યોમાંથી પંદર હજારથી વધુ ભારતીય મૂળના નાગરિકો ઉપસ્થિત રહ્યા હતા.
વડા પ્રધાન નરેન્દ્ર મોદી કાર્યક્રમ સ્થળે પહોંચ્યા એ અગાઉ ભારતીય કલાકારોએ સાંસ્કૃતિક કાર્યક્રમો રજૂ કર્યા હતા. વિવિધ રાજ્યોના પાંચસો કરતા વધુ કલાકારોએ ભારતીય લોકગીતો પર આધારિત નૃત્યો રજૂ કર્યા હતા. જોકે કાર્યક્રમનું આકર્ષણ બની હતી ગુજરાતની વિખ્યાત ગાયિકા ઐશ્વર્યા મજમુદાર.
The stage is set.
Looking forward to PM @narendramodi’s address soon at Nasseu Coliseum, New York. #Modi&US pic.twitter.com/R050U1zdkm— Dr. S. Jaishankar (@DrSJaishankar) September 22, 2024
અમેરિકામાં નવરાત્રિની ઉજવણી માટે ગયેલી ઐશ્વર્યા ત્યારે સાતમા આસમાનમાં વિહરવા લાગી જ્યારે દેશના વડા પ્રધાનના ઇન્ડિયન ડાયસ્પોરાના કાર્યક્રમમાં પર્ફોર્મ કરવાનું આમંત્રણ મળ્યું. હજારો લોકોની ઉપસ્થિતિમાં પર્ફોર્મ કરવું ઐશ્વર્યા માટે કોઈ મોટી વાત નહોતી. પણ ભારતના વડા પ્રધાન ઉપસ્થિત રહેવાના હોય અને પંદર હજાર કરતા વધુ ભારતીયોની હાજરી હોય એ કાર્યક્રમમાં ગરબાની સાથે રાષ્ટ્રગીત રજૂ કરવું એ મારા જીવનની સૌથી ગર્વની ઘડી હતી, એમ ઐશ્વર્યાએ જણાવ્યું હતું.
ઐશ્વર્યા મજુમદાર હાલ અમેરિકામાં છે અને ત્યાં વસતા ગુજરાતીઓ દ્વારા આયોજિત નવરાત્રિ ઉત્સવમાં પર્ફોર્મ કરી રહી છે. આપણે ત્યાં ગુજરાતીઓના માનીતા નોરતાની શરૂઆત હિન્દુ પંચાંગ મુજબ ભલે દસેક દિવસ બાદ થવાની હોય. પરંતુ અમેરિકામાં તો રાસ-ગરબાની રમઝટ એ પહેલાં જ શરૂ થઈ જતી હોય છે.
જોકે આજે વિશ્વના તમામ ખૂણે ગુજરાતીઓ રહેતા હોવાથી નવરાત્રિ એક ગ્લોબલ ધાર્મિક ઉત્સવ બની ગયો છે. ભારતમાં નવરાત્રિ ભલે નવ દિવસ ઉજવાતી હોય પણ વિદેશમાં વસતા ગુજરાતીઓ સતત નવ દિવસ નવરાત્રિની ઉજવણી કરી શકતા નથી. એટલે તેઓ જૂનથી ઓક્ટોબર મહિના સુધી દર શનિવાર-રવિવારે ગરબાનું આયોજન કરતા હોય છે.
વિદેશમાં નવરાત્રિની ઉજવણીને લોકપ્રિય બનાવવામાં મોટો ફાળો ગાયકોનો છે. આવી જ એક ગુજરાતની વિશ્વવિખ્યાત કોકિલકંઠી ગાયિકા ઐશ્વર્યા મજુમદાર. હાલ અમેરિકામાં વસતા ગુજરાતીઓ ઐશ્વર્યાના ગરબાના તાલે ગરબે ઝૂમી રહ્યા છે.
દેશ કી આવજના સમાચાર ફેસબુક પર મેળવવા માટે ફેસબુક પેજ લાઈક કરો