Textile Parcel Special Train: રેલવે રાજ્યમંત્રીએ પશ્ચિમ રેલવેની ટેક્સટાઇલ પાર્સલ સ્પેશિયલ ટ્રેનને લીલી ઝંડી બતાવી રવાના કરી
Textile Parcel Special Train: ઉધના ન્યૂ ગુડ્સ શેડથી પ્રથમ ટેક્સટાઇલ પાર્સલ સ્પેશિયલ ટ્રેન ચલાવવામાં આવી
અમદાવાદ, 05 સપ્ટેમ્બરઃ Textile Parcel Special Train: રેલ રાજ્યમંત્રી દર્શના જરદોશે શનિવાર 4 સપ્ટેમ્બર, 2021 ના રોજ પટના નજીક દાનાપુર અને મુજફ્ફરપુર નજીક રામ દયાલુ નગર માટે પશ્ચિમ રેલવેની ઉધના ન્યૂ ગુડ્સ શેડની પ્રથમ ટેક્સટાઇલ પાર્સલ સ્પેશિયલ ટ્રેનને લીલી ઝંડી બતાવી રવાના કરી. પશ્ચિમ રેલવેના મુખ્ય જનસંપર્ક અધિકારી સુમિત ઠાકુરે જાહેર કરેલ એક પ્રેસ રિલીઝ અનુસાર, પશ્ચિમ રેલવેના મુંબઈ મંડળના બિઝનેસ ડેવલપમેન્ટ યુનિટ (BDU) ના સતત પ્રયાસોને કારણે ઉધના ન્યૂ ગુડ્સ શેડ ખાતે પ્રથમ વખત કસ્ટમાઇઝ્ડ NMG વેગનમાં કપડાંના પાર્સલ લોડીંગ થયું છે.
આ ક્રમમાં ઉધના ન્યૂ ગુડ્સ શેડથી પટના અને મુઝફ્ફરપુર વિસ્તારો માટે પ્રથમ વખત 25 NMG વેગન સાથે ટેક્સટાઇલ પાર્સલ સ્પેશિયલ ટ્રેન દોડાવવામાં આવી હતી. આ નવીન પહેલથી ખાસ કરીને સુરત વિસ્તારના કાપડ બજારને ફાયદો થશે, કારણ કે તે આર્થિક, ઝડપી અને સલામત છે. આ પહેલના પરિણામે, કાપડ બજારની વિશાળ સંભાવનાનો ઉપયોગ કરવા માટે નોંધપાત્ર તકો ઉભી કરવામાં આવી છે, જે સુરત શહેર અને તેની આસપાસ સ્થિત કાપડ ઉદ્યોગ અને વેરહાઉસ કેન્દ્રોની પરિવહન જરૂરિયાતોને શ્રેષ્ઠ રીતે પૂરી કરશે.
આ પ્રસંગે, કlરંજના માનનીય ધારાસભ્ય પ્રવીણભાઈ ઘોઘારી અને લિંબાયતના માનનીય ધારાસભ્ય સંગીતાબેન પાટીલ, FOSTTA એટલે કે ફેડરેશન ઓફ સુરત ટેક્સટાઈલ ટ્રેડર્સ એસોસિએશન ના પ્રતિનિધિઓ, પશ્ચિમ રેલવેના મુંબઈ સેન્ટ્રલ વિભાગના વિભાગીય રેલવે મેનેજર જીવીએલ સત્ય કુમાર અને રેલવેના અન્ય વરિષ્ઠ અધિકારીઓ પણ હાજર હતા. શરૂઆતમાં, મંડળ રેલ મેનેજર સત્ય કુમારે માનદ રેલવે રાજ્ય મંત્રી અને અન્ય મહાનુભાવોને મંચ પર આવકાર્યા હતા.
ઠાકુરે કહ્યું કે પરિવહન એગ્રીગેટર્સ, ટ્રાન્સપોર્ટરો, એસટીજીટીએ જેવા પરિવહન સંગઠનો અને ફોસ્ટટા અને એસજીટીટીએ જેવા કપડાં ઉત્પાદક અને વેપારીઓ સંગઠનો સાથે નિયમિત બેઠકોએ સેવા પ્રદાતા તરીકે રેલવે પ્રત્યે ઉદ્યોગોની દ્રષ્ટિ બદલવામાં મહત્વની ભૂમિકા ભજવી છે. નોંધનીય છે કે તાજેતરમાં, પશ્ચિમ રેલવેના મુંબઈ વિભાગે પ્રથમ વખત 202.4 ટન કાપડના પાર્સલ ચલથાણથી કોલકાતા નજીક શાલીમાર પરિવહન કર્યા છે.
